Премиерата на филмот „The Last Screenwriter“, првиот долгометражен филм целосно напишан од вештачката интелигенција ChatGPT, требаше да се одржи во киното Prince Charles Cinema во Лондон. Режисерот на филмот, Питер Луиси, изјави за The Daily Beast (БИСТ) дека театарот одлучил да го откаже настанот по добиени 200 жалби.
„Бев целосно изненаден, не го очекував тоа,“ рече Луиси. Иако на сајтот на театарот настанот беше најавен, деталите и постерот беа брзо отстранети, а посетителите беа информирани преку е-пошта за откажувањето и за враќањето на парите, но без објаснување за причините.
Филмската индустрија и вештачката интелигенција
„The Last Screenwriter“ ја следи приказната за Џек, успешен сценарист кој користи напреден AI систем за пишување сценарија. Сценариото за филмот—вклучувајќи заплет, ликови и дијалог—го напиша ChatGPT, револуционерниот четбот на компанијата OpenAI. Луиси изјави дека идејата за филмот била негова и дека започнала со едноставно барање кон ChatGPT: „Напиши заплет за долгометражен филм во кој сценаристот сфаќа дека не е толку добар како вештачката интелигенција во пишување.“
„Повеќето не можеа да веруваат колку е добро сценариото,“ рече Луиси, зборувајќи за реакциите на актерите. Сепак, тој е свесен дека темата на филмот доаѓа во чувствителен момент, особено по минатогодишните штрајкови во Холивуд каде писателите бараа подобри заштити од вештачката интелигенција која претставува закана за нивните работни места, објави Yahoo news.
Луиси планира филмот да биде достапен онлајн бесплатно од 11 јули, заедно со документација која покажува како ChatGPT го напиша својот прв долгометражен филм. „Не сакам луѓето да кажат: ‘Профитираш од нашата беда и го користиш ова како маркетиншки алат за да заработиш,’“ рече Луиси. „Сакам да го направам ова како придонес за целта.“
