Патентот, поднесен од „Мајкрософт“ во 2024 година, опишува како генеративната вештачка интелигенција може брзо да создаде предмети и содржини релевантни за приказната на играта врз основа на информации што ќе ги внесе корисникот. Овој систем им овозможува и на дизајнерите и на играчите да ги приспособат правилата на играта, да создаваат нови системи, НПЦ-карактери или дури и наративна содржина во реално време.
Еден пример наведува како овој систем може да се имплементира во игри како „Мајнкрафт“, дозволувајќи им на играчите да дефинираат нови елементи на играта преку внесување информации, од правила до нови ликови и приказни.
Важно е да се напомене дека ова е само патент. Корпорациите често патентираат технологии кои можеби никогаш нема да бидат имплементирани во реалноста. Сепак, ова дава увид во насоките што ги истражува „Мајкрософт“.
„Мајкрософт“ веќе е длабоко вклучен во развојот на вештачката интелигенција, особено преку својата мултимилионска инвестиција во „Опен АИ“. Во 2024 година Хаијан Џанг, шеф на одделот за вештачка интелигенција на „икс бокс“, изјавил дека вештачката интелигенција ќе ја подобри работата на развивачите на игри, но нема да ги замени луѓето во процесот на развој.
Генеративната вештачка интелигенција е тема што покренува многу етички дебати, особено кога станува збор за системска обука и потенцијалните последици врз работните места. На пример, „Електроник артс“ во 2024 година покажа концепт каде што играчите можат да го генерираат светот на играта преку нивните информации. Сепак, многу експерти од индустријата се скептични.
Иако генеративната вештачка интелигенција ветува дека ќе олесни одредени аспекти на развојот на играта, многумина сè уште сметаат дека човечкиот придонес е неопходен. Развојот на овие технологии мора внимателно да балансира помеѓу иновациите и зачувувањето на креативните работни места на програмерите и дизајнерите за игри.
