„Гугл“ најави дека ќе започне со тестирање на вештачка интелигенција за одредување дали корисниците ги исполнуваат условите за возраста за користење на неговите производи.
Компанијата го претстави новиот метод во блог-пост посветен на „Нови дигитални заштити за деца, тинејџери и родители“. Овој автоматизиран систем ќе се користи низ повеќе гугл-платформи, вклучувајќи го и „Јутјуб“. Корисниците под 18 години веќе имаат одредени ограничувања за пристап до одредени услуги, а новиот модел ќе помогне во поефикасна примена на овие рестрикции.
– Оваа година ќе започнеме со тестирање на модел базиран на машинско учење за процена на возраста во САД. Овој модел ќе ни помогне да процениме дали корисникот е под или над 18 години за да можеме да обезбедиме поприспособено корисничко искуство – изјави Џен Фицпатрик, потпретседателка на технологиите „Гугл кор“.
Најновиот чекор на „Гугл“ во областа на вештачката интелигенција доаѓа во време кога законодавците вршат притисок врз онлајн платформите да воведат повеќе мерки за заштита на децата. Компанијата изјави дека со текот на времето ќе ја прошири својата процена на возраста во повеќе земји. „Мета“ веќе воведе слични функции во септември, користејќи вештачка интелигенција за откривање дали некој лаже за својата возраст.
„Гугл“ и други компании во технолошката индустрија сè повеќе се потпираат на вештачката интелигенција за различни задачи и производи. Користењето на вештачката интелигенција за контрола на возраста претставува најнов фронт за „Гугл“ во оваа област.
Новата иницијатива на тимот „Кор“ на „Гугл“ доаѓа и покрај тоа што компанијата го реорганизира овој оддел минатата година, отпуштајќи стотици вработени и префрлајќи дел од работните места во Индија и Мексико.
