Apple вчера, нешто пред најавениот термин, го пушти во јавна дистрибуција iOS 18.4, со што за првпат официјално им овозможи на корисниците од ЕУ да го користат нивниот AI систем.
Доколку имате iPhone 15 Pro или некој од моделите од серијата 16 и го користите на еден од поголемите странски јазици – имаме вест за вас. Apple во понеделникот во вечерните часови по наше време ги пушти во јавна дистрибуција iOS 18.4, iPadOS 18.4 и macOS Sequoia 15.4, со што официјално за првпат на корисниците во Европската унија им го стави на располагање долго најавуваниот систем на генеративна вештачка интелигенција Apple Intelligence.
Само на „поголемите“ јазици
Овој „личен AI систем“, кој главно се изведува директно на самите уреди за да ја заштити приватноста на корисниците, ги исполни сите регулаторни услови и може да биде активен на мобилните и останатите Apple уреди во ЕУ – но не на сите јазици. Apple Intelligence моментално е достапен на италијански, француски, германски и шпански, од јазиците кои се користат на нашиот континент, како и на американски и британски англиски.
Новото ажурирање на iOS донесе и неколку подобрувања за AI системите кои досега не биле достапни никому, како што се автоматско истакнување на приоритетни нотификации, креирање на нови видови илустрации во апликацијата Image Playground, додека на Mac овозможува создавање на видео „спомени“ само врз основа на внесен текстуален промпт.
iOS 18.4 е достапен за iPhone модели од верзијата XS па нагоре, а за оние што не го поддржуваат Apple Intelligence носи низа безбедносни и квалитативни надградби. Новата надградба за првпат донесе AI алатки и на наглавниот уред Apple Vision Pro. Таму тие ќе функционираат само на американски англиски, овозможувајќи познати генеративни функции, но прилагодени за проширена реалност – што веројатно ќе ги израдува двата активни корисници на овој уред.
