„Тик-ток“ воведе нова функција за вештачка интелигенција наречена „Тик-ток АИ алајв“, која им овозможува на корисниците да претворат обични фотографии во динамични видеа во рамките на опцијата „Тик-ток приказни“. Новата опција е достапна исклучиво преку „Стори“ камерата во рамките на апликацијата и користи напредна вештачка интелигенција за креирање кратки видеа збогатени со движење, атмосфера и специјални креативни ефекти.
На пример, корисниците можат да претворат фотографија од пејзаж што ги вклучува небото, облаците и океанот во анимирано видео во кое бојата на небото постепено се менува, облаците полека се движат, а звукот на брановите може да се слушне. Исто така, можно е да се анимираат групни селфиња и да се нагласат гестовите или изразите на лицето на учесниците на сликата.
Содржината креирана преку „АИ Алајв“ е јасно означена како генерирана од вештачка интелигенција преку посебна етикета во апликацијата. Исто така, ваквите видеа содржат вградени „C2PA“ метаподатоци – технички стандард што ѝ овозможува на вештачката интелигенција да препознава содржина, дури и откако содржината ќе биде преземена и споделена надвор од платформата.
„Тик-ток“ нагласува дека безбедноста и заштитата на корисниците се приоритети во развојот на вакви технологии. Пред да му се презентира конечниот резултат на корисникот, содржината на алатката поминува низ повеќе нивоа на безбедносни проверки, вклучувајќи анализа на оригиналната фотографија и текстуални пребарувања за да се генерира содржината. Корисниците имаат можност да пријават содржина за која сметаат дека ги крши упатствата на заедницата, а дополнителни безбедносни проверки се спроведуваат и откако корисниците ќе споделат приказни за „АИ Алајв“.
