Хангжу во Кина бил домаќин на првиот турнир во борачки вештини во светот на кој учествувале исклучиво хуманоидни роботи.
Кинеските медиуми велат дека ова е историски момент за домашната роботска индустрија, особено за производители како што е „Унитри“, чии роботи биле меѓу учесниците. Гледачите можеле да видат серија демонстративни и вистински борби со роботи водени од човечки оператори. Имало боксерски и кикбокс-натпревари еден на еден, но и групни борби, во кои роботите во рингот биле контролирани од четири оператори истовремено.
Некои роботски борци веќе демонстрирале импресивни вештини во удирање со прави тупаници, како и техники на шутирање и „летачки“ удари со нога, а оние што биле погодени ги демонстрирале своите вештини за станување од земјата по падот, според пишувањата на репортерите од натпреварот. Како и во вистинските борби, регистрирани биле и „повреди“ – бидејќи многу роботи претрпеа оштетувања од удари, првенствено на нивниот метален оклоп, и покрај фактот што носеа ракавици и кациги за време на борбата.
Имало и неочекувани ситуации, па еден од „борците“ паднал и ја загубил борбата. Другиот се заплеткал во јажињата околу рингот и не можел да се помрдне, ниту да се бори. Следниот чекор, велат организаторите, ќе биде развој на невронски мрежи кои, наместо луѓето, би можеле да ги контролираат движењата на борбените роботи и да им овозможат да се борат автономно. Во секој случај, натпревари како овој ќе продолжат да се организираат за да се истакнат можностите на кинеската роботска индустрија, интеграцијата на науката, културата и туризмот, а воедно да бидат и едукативни и забавни.
