Познатата стриминг платформа Spotify најави нова функција – Messages, услуга за размена на пораки директно во апликацијата. Според компанијата, ова доаѓа како одговор на барањата на корисниците кои сакаат „посебен простор во апликацијата за споделување песни, подкасти и аудио-книги со пријателите и семејството, како и полесен начин за следење на препораки“.
Како функционира Messages?
Функцијата оваа недела почнува да се воведува за бесплатни корисници и Premium претплатници над 16 години, на одбрани пазари. Интересно е што Messages ќе биде достапен само на мобилни уреди, а не и на десктоп или веб.
Spotify објаснува дека „вистинската препорака може да започне одличен разговор“, па затоа Messages е дизајниран како брз и практичен начин за комуникација и споделување содржина. Сепак, останува прашањето – зошто корисниците не би го правеле ова преку WhatsApp, Instagram или Telegram?
Клучни ограничувања и можности
- Само еден-на-еден разговори – нема групни четови како кај другите апликации.
- Може да се дели само Spotify-содржина – песни, подкасти, аудио-книги.
- Разговор може да започне со контакти со кои претходно сте споделиле содржина, а за нови ќе мора да испратите барање.
- При испраќање, корисникот избира песна, подкаст или книга → Share → пријател.
- Примачот мора да го прифати барањето за порака пред да започне разговор.
Messages е достапен преку профилната фотографија во горниот лев агол на апликацијата. Таму ќе се прикажат предложени контакти врз основа на претходни интеракции – Jam, Blend, заеднички плејлисти или Family/Duo планови.
Контрола и приватност
Функцијата може целосно да се исклучи во поставките. Spotify тврди дека разговорите се заштитени со индустриски стандард за енкрипција, но сепак ќе користи проактивна технологија за детекција на незаконита и штетна содржина, а модератори ќе имаат пристап за проверка на сомнителен материјал.
