Научниците тестираат 6Г-технологија: Брзини 9.000 пати побрзи од 5Г
Додека 5Г-технологијата веќе го обликува нашиот дигитален свет, научниците од Универзитетот во Лондон прават значајни чекори кон 6Г-технологијата, која ветува драстично повисоки брзини. Тимот предводен од Жиксин Лиу демонстрираше безжичен пренос на податоци со брзина од 938 гигабити во секунда (Gbps), што е над 9.000 пати побрзо од сегашната просечна 5Г-брзина. Оваа неверојатна брзина може да овозможи преземање на над 20 филмови за една секунда.
За постигнување на овие брзини, тимот користел поширок спектар на фреквенции од досега, работeјќи во опсег од 5 до 150 гигахерци. Овој иновативен пристап комбинира радиобранови и светлина за зголемување на капацитетот за пренос на податоци. Целта на експериментот била да се утврди колкава брзина може да достигне 6Г-технологијата во иднина, поставувајќи нови стандарди за мултиплексирани податоци.
Брзата радиска пристапна мрежа од следната генерација (РАН) ќе бара брзини над 100 Gbps за да обезбеди брз пренос на податоци меѓу базните станици и поврзувачките точки. Оваа потреба ја мотивирала групата научници да го истражуваат целиот безжичен спектар од под 6 гигахерци до милиметарскиот опсег, користејќи нови технологии за пренос.
Иако целосно електронските и оптоелектронските методи се тестирани одделно поради предизвиците со синхронизација на фреквенциите, научниците успешно демонстрирале пренос со ултраширок опсег од 145 гигахерци. Ова го направиле преку ортогонално мултиплексирање на фреквенции (ОФДМ), што овозможило постигнување на високи брзини на податоци со минимален јаз меѓу опсезите.
Тимот веќе преговара со производители на паметни телефони и даватели на мрежни услуги, со надеж дека оваа работа ќе стане основа за идната 6Г-технологија. Иако се развиваат и други конкурентни пристапи, научниците се оптимисти дека нивниот иновативен метод ќе игра клучна улога во новата ера на безжична комуникација.
